තැපැල් ඡන්දය ප්‍රකාශ කිරීමේදී ඡන්ද පත්‍රිකාව ඡන්ද මධ්‍යස්ථානයෙන් පිටතට රැගෙන යාමේ චෝදනාව මත අත්අඩංගුවට ගත් මහනුවර ප්‍රදේශයේ පාසල් ගුරුවරියක වන 53 හැවිරිදි කාන්තාවක් පොලිස් ඇප මත මුදා හැර තිබේ.
මහනුවර වාරියපොළ ශ්‍රී සුමංගල විද්‍යාලයේ ඡන්ද මධ්‍යස්ථානයේ දී පාසල් ගුරුවරිය විසින් ලකුණු කළ ඡන්ද පත්‍රිකාව වෙනුවට තැපැල් ඡන්ද ලියුම් කවරයේ අපේක්‍ෂක ලැයිස්තුව වැරදීමකින් ඇතුළු කර ඇතැයි වාර්තා වේ. මාතලේ ප්‍රදේශයේ පදිංචි ගුරුවරිය පසුව නිවසට පැමිණෙන විට ඇය සන්තකයේ තිබී ලකුණු කළ ඡන්ද පත්‍රිකාව සොයා ගෙන ඇති අතර වහාම මේ සම්බන්ධයෙන් තම පාසලේ විදුහල්පතිවරයාට දන්වා ලකුණු කළ ඡන්ද පත්‍රිකාව ඔහු වෙත ලබා දී ඇත.
විදුහල්පතිවරයා මේ සම්බන්ධයෙන් මැතිවරණ නිලධාරීන්ට දැනුම් දී ඇති අතර, අනතුරුව ඡන්ද මධ්‍යස්ථානයෙන් පිටත ඡන්ද පත්‍රිකාව රැගෙන යාම මැතිවරණ නීතිය යටතේ වරදක් බැවින් ගුරුවරිය අත්අඩංගුවට ගෙන ඇත.
තම වරද පිළිගෙන, දැනුම් දුන් විට අධිකරණයේ පෙනී සිටීමට එකඟ වීමෙන් පසු මහනුවර පොලිසිය එම කාන්තාව පොලිස් ඇප මත මුදා හැරියේය.
